ഇന്നലെകളില്ലാതെ
ഇന്നുകളുമില്ലാതെ
നാളേക്കുവേണ്ടി ഞാനെന്തു ചെയ്യും?
താഴെ നിന്നാരോ എറിഞ്ഞിട്ട കല്ലുപോല്
താഴേക്കു തന്നെ പതിക്കുന്നു ഞാന്...
താനേ പറക്കാത്ത പക്ഷിയായ് എന് മനം
ചിറകിന്റെ ജീവനായ് കാത്തിരിപ്പു...
മുന്പേ പറക്കുന്ന പക്ഷികള് പാടുന്നു
അതിജീവനത്തിന്റെ സൂത്രവാക്യം ,
"ഒഴുകുന്നു ഞങ്ങളീ ഒഴുക്കിനോടൊപ്പം
നീയും വരൂ .... ഇനിയും വൈകിയില്ല"
അറിയാത്ത സ്വരമാണാപ്പാട്ടിനെന്നു ഞാന്,
അറിയുന്നു - പാടുവാനാകില്ലെന്നും
പാടിപ്പറക്കുവാനാഗ്രഹമുള്ളതോ
നവജീവിതത്തിന്റെ വീരഗാഥ
എതിരേയാണെന് വഴി , ഏകനാണിന്നു ഞാന്,
എങ്കിലും ഞാന് കാത്തിരിക്കും ...
ചിറകിന്നു ജീവന് മുളക്കുവാനായ്
എന്റെ പാട്ടില് സ്വരങ്ങള് നിറയുവാനായ്
ഇന്നലെകളില്ലാതെ
ഇന്നുകളുമില്ലാതെ
നാളേക്കുവേണ്ടി ഞാന് കാത്തിരിക്കാം
നവജീവിതത്തിന്റെ മാറ്റൊലിക്കായ്.
4 comments:
ആശംസകള് .....ആശംസകള് .....ആശംസകള് ....
ബൂലോകത്തേയ്ക്ക് സ്വാഗതം
ആശംസകള്......ശ്രീനി...
Post a Comment